من بين كلام الناس وانفعالتهم.....ووجوه البشر الى رايحة جايه
من وسط البيوت والزحمة والزهق وزنقة الميكروباص...
من بين قلق الامتحانات..وحرقة الشمس ..
من بين خنقتى من الناس وقرفى من الانتظار..وزهقى من كتر التسامح بدون مقابل ....
من بين كل نظرات الاعجاب لأى حد معدى..من بين اندماجاتى مع اى تجمعات سواء مع اصحابى او قرايبى او مع نفسى
بفتكرك....
ويتسرسب فى قلبى حبك...
يدفى كل شرايينى البردانة وهى بعيد عن قلبك ...
بلاقينى ببتسم لوحدى..
.لما افتكر حوارك معايا..
.وأفتكر أد ايه أنت جميل..وأد ايه انت واحشنى ..
وأفتكر أد ايه ببقى نفسى ...أرد على كلامك كله بحضن على سهوة أحضنه ليك فى وسط كلامك..واقولك بعدها كمل ..
بس بقعد مكتفة ايدى ادامك...مش بعمل حاجه غير انى ببتسم وأنا مركزة فى ملامحك لحد ماتخلص
....وببقى خلاص هموت وأحضنك...
بس مش بموت .. ومش بحضنك...
وبرجع تانى للزحمة والزهق والزنقة وخنقى من الناس....
...................................
مش عارفة ليه بحس انك شبه كل حاجة حلوة بشوفها....
رغم انها ممكن متكنش ليها علاقة بيك
بس نفس الفرحة اللى بتعملها فى قلبى ...نفس الفرحة اللى بتحصل لما بشم ريحتك...
قلبى بيشبه عليك...لما بيفرح فى اى وقت..
وبيتلغبط...الفرحة دى منك ..ولا من اى حد؟
...................................
صدقنى بقيت أنت شبه كل حاجة حلوة بحبها...
ببص فى وشوش البشر..بفتكر حبك ليهم.....وبحبهم أكتر
ببص فى وردة فى الشارع بتمنى انك تديهالى ...
بتمشى فى الشوارع
بفتكر عشقك ليها....
بتمشى ع الكورنيش ..ببص على النيل ...ببص على الاهرامات..
وبتمنى نمشى انا وانت مرة فى العمر عليهم...
بسمع أغنية حلوة..
كلماتها بتتركب عليك تلقائيا
بسمع أغنية حزينة ...
بتخيل حالى لو بعدت عنى ..
بسمع أغنية شعبية ..
بتخيل جنانك وقت ما تسمع الاغنية دى ..
بسمع أغنية أطفال..
بتخيل أد ايه ضحكتك بريئة ..
بقيت أحب وحدتى ...عشان هفكر فيك براحتى..
من غير ما حد يقطع طيف خيالك عنى..
ليست هناك تعليقات:
إرسال تعليق